Naqqiuteqarnissamut pisinnaatitaaffiit ilisimaguk

Isumaqaruit, oqartussat suliarineranni paasissutissat eqqunngitsuusut.

Naqqiuteqarnissamut pisinnaatitaaffik

Oqartussaqarfimmi illit pillutit eqqunngitsunik paasissutissaqarpat inunnik paasissutissanik suliarinnittarneq pillugu inatsit naapertorlugu paasissutissat iluarsitinnissaannut pisinnaatitaaffeqarputit.

Tamanna aamma naqqiuteqarnissamut pisinnaatitaaffimmik taaneqartarpoq.

Oqartussaqarfik attavigiuk

Paasissutissat iluarsitinniarlugit oqartussaqarfik paasissutissanik pigisaqartoq attaveqarfigissavat.

Oqartussaqarfiup suliassaq suliarissavaa, qanorlu iliornissaminik illit akissuteqarfigissallutit.

Qanoq saaffiginnissavit?

Sianerlutit, allakkatigut imaluunniit e-maili aqqutigalugu naqqeeqqusisinnaavutit.

Qanoq oqassavit?

Nassuiaatigissavat paasissutissat sorliit illit isummat malillugu eqqunngitsuunersut.

Kissaateqarnerit paatsuugassaajunnaarsinniarlugu isumassarsiatsialaasinnaavoq oqassallutit, imaluunniit allassallutit paasissutissat naqqinneqarnissaannik kissaateqarnerit inunnik paasissutissanik suliarinnittarneq pillugu inatsit naapertorlugu tamanna qinnutigigit. Inunnik paasissutissanik suliarinnittarneq pillugu inatsimmi § 37 innersuussutigissavat.

Oqartussaqarfik qanoq naqqiissava?

Oqartussaqarfik nalinginnaasumik ilassummik allattaqartarpoq, paasissutissat illit maalaarutigisatit eqqunngitsuusut imaluunniit ilinnit akueriumaneqanngitsut.

Tamatumunnga pissutaavoq oqartussaqarfiit nalinginnaasumik paasissutissanik, suliamut ilanngunneqareersimasunik, peersiinnaqqusaanngimmata. Oqartussaqarfiimmi sulianik suliarinninnerminni suut suliarinerlugit nalunaarsortussaavaat.

Taamaattumik amerlasuutigut pisariaqarsinnaavoq oqartussaqarfiup allakkiamik nutaamik pilersitsisariaqarnissaa, paasissutissat eqqortut – imaluunniit paasissutissanut illit isiginninnerit - allanneqassallutik.

Oqartussaqarfiup isumagissavaa naqqiissummut, sapinngisamik paasissutissanut eqqunngitsunut imaluunniit akueriumaneqanngitsunut attuumassutilinnut qaninnerpaanut, innersuussisoqarnissaa.

Pisut assigiinngitsut

Paasissutissat eqqunngitsuunersut taamalu iluarsineqartariaqartuusut paasinarsisissallugu ilaatigut ajornaatsuinnaaneq ajorpoq.

Datatilsynip pisut assigiinngitsut pingasut naammattoorajuttarpai:

Pisoq 1: Paasissutissat eqqortuunnginnerannik oqartussaqarfik isumaqataagaangat

Paasissutissat eqqortuunnginnerannik oqartussaqarfik isumaqataaguni taakku iluarsineqarnissaat isumagissavaa. Assersuutigalugu tassaasinnaapput paasissutissat piviusut, taamalu assortuussutigineqartariaqanngitsut.

Pisuni taama ittuni oqartussaqarfik naqqiissuteqartarpoq, amerlasuutigut ilassummik allanneqartarluni paasissutissat pineqartut eqqunngitsuusut.

Paasissutissat eqqunngitsut ingerlateqqinneqarsimappata qinnutigisinnaavat paasissutissanik eqqunngitsunik tigusisut aamma naqqiummik nalunaarfigineqassasut.

Paasissutissanik eqqunngitsunik tigusisunut nalunaaruteqarnissamik oqartussaqarfik taamaallaat itigartitsisinnaavoq, taakku nalunaarfigineqarnissaat pisinnaanngippat imaluunniit ajornarluinnarpat.

Assersuut

Kommunemi misissuinermi takuneqarsinnaavoq paasissutissat piviusut kukkunernik ulikkaartut, Ilaatigut ernerpit atia kukkullugu allanneqarsimavoq. Tassanilu aamma allaqqavoq ernerit pinerluttuliorsimasoq, taamaaliorsimananili.

Kommune misissuinermik nutaamik suliaqassaaq, aammalu suliami erseqqilluinnartumik allassallugu siulleq kukkusuusoq.

Pisoq 2: Paasissutissat pillugit isumaqatigiinngissuteqartoqarpat

Oqartussaqarfiup paasissutissat eqqortuunnginnerannik ilaatigut isumaqitiginngittarsinnaavaatit. Assersuutigalugu ataatsimeeqatigiinnermi imaluunniit angerlarsimaffimmut pulaarnermi nassuiaatigineqartut isumaqatigiinngissutigineqarsinnaapput.

Pisuni taama ittuni oqartussaqarfiup isumagissavaa paasissutissanut ilassummik ilanngussisoqarnissaa, illit isumaqataannginnerit takuneqarsinnaassalluni.

Pisoq 3: Naliliinerugaangat

Oqartussaqarfiit amerlasuutigut apeqqutini assigiinngitsuni naliliinitik allattarpaat. Assersuutigalugu tassaasinnaavoq pissutsit ilinnut tunngasut pillugit nakorsap imaluunniit isumaginninnermi siunnersortip suliamik ilisimasalittut naliliineri.

Aamma pisumi taama ittumi aaqqiissutissaq tassaavoq illit isummavit paasissutissanut ilanngunneqarnissaat, suliami naliliinerit illit isumaqatiginngikkukkit.

Assersuut

Atuarfimmi pisortaq kommunemut allagaqarpoq, illit angerlarsimaffinni atornerluisoqarnersoq aarleqqutigalugu.

Atornerluisoqarneranik isumaqataannginnerit ilanngutitissinnaavat. Kisianni atuarfiup pisortaata nalunaarutiginninnera peersissinnaanngilat.

Inunnik paasissutissanik suliarinnittarneq pillugu inatsit naapertorlugu aamma suut allat pisinnaatitaaffigivigit?

  • Oqartussaqarfinnit aamma suliffeqarfinnit ilisimatinneqarnissaq, illit pillutit paasissutissanik elektroniskimik katersuillutillu toqqortaateqarpata.
  • Illit pillutit paasissutissat atorneqarnerannut akerliuneq – akerliunerit pissutissaqarpat paasissutissat nalinginnaasumik peerneqassapput.
  • Illit pillutit paasissutissat, aamma pisisartuuninnut tunngasut pilerisaarineq siunertaralugu allanut tunniunneqarnissaannut akerliliinissaq.
  • Paasissutissat eqqunngitsut iluarsineqarnissaannik, peerneqarnissaannik imaluunniit naqqinneqarnisssaannik kissaateqarneq, aamma allat paasissutissanik tigusaqarsimasut susoqarsimaneranik nalunaarfigineqassasut.
  • Illit pillutit paasissutissanik suliarinninnissamik akuersininnik utertitsineq.
  • Datatilsynimut maalaaruteqarnissaq – kisianni oqartussaqarfik imaluunniit suliffeqarfik naammagittaalliutigisat naammagittaalliutivit akineqarnissaat pillugu saaffigeqqaaruk.