Isumannaallisaanermik unioqqutitsisoqarneranut ilaasimava?

Quppernermi matumani atuarisinnaavat isumannaallisaanikkut unioqqutitsisoqarneranut eqqugaasimaguit qanoq iliussanerlutit, imaluunniit inuit allat pillugit paasissutissanik kukkunikkut tigusaqarsimaguit qanoq iliuuseqassanerlutit.

Innuttaasutut paasissutissaatitit isumannaallisaanikkut unioqqutitsisoqarnerani pineqarsimappata qanoq iliortariaqarpit?

Paasissutissaatitit inuttut paasissutissanik isumannaallisaanikkut unioqqutitsisoqarnerani pineqarsimasut paasigukku, ilinnut ajoquserutaasinnaasut killilersimaarniarlugit qanoq iliuuseqartoqarsimanersoq paasiniarlugu siullermik suliffeqarfimmut imaluunniit oqartussaasumut akisussaasumut saaffiginnittariaqarputit.

Tamatuma kingorna suliffeqarfiup imaluunniit oqartussaasup iliuuserisimasai naammaginngikkukkit, Paasissutissanik Nakkutilliisoqarfimmut naammagittaalliuuteqarsinnaavutit (qanoq naammagittaalliuuteqarsinnaanerlutit uani annertunerusumik atuarsinnaavutit).

Ataani allatigut qanoq iliorsinnaanerlutit pillugu siunnersuutinik nassaarisinnaavutit.

Paasisaqarnerorusukkuit digisila.gl aamma sikkerdigital.dk alakkarsinnaavatit.

Isumannaallisaanikkut unioqqutitsisoqarneranit eqqugaasimasutut ilinnut siunnersuutitsialaat

E-mailadressit isissutissallu allanut anngussimappata, isissutissat ingerlaannaq allanngortissavat.

Isissutissaq taanna arlalinni atorsimagukku, sumiiffinni taakkunani allani aamma allanngortissavat.

Phishing tassaavoq peqquserlunneq, pinerluttut salloqittaallutik ilinnit paasissutissanik, soorlu qarasaasiatigut isernissamut paasissutissanik, akiliisarnermut kortit pillugit paasissutissanik imaluunniit PIN-kodinik, pissarsiniartarnerat. Tamanna amerlanertigut e-mailit, SMS-it imaluunniit oqarasuaatikkut sianernerit salloqittaaniutit aqqutigalugit pisarpoq.

Taamaattumik suliniaqatigiiffik aalajangersimasoq sinnerlugu attaveqarnerarlutik e-mailikkut, SMS-ikkut, inuit attaveqaqatigiittarfiisigut nalunaarutitigut imaluunniit oqarasuaatikkut attaveqarfigineqaruit, mianersorluinnassaatit - pingaartumik paasissutissanik tunniussinissamik imaluunniit linkimik toorsillutit nittartakkami tatiginarpasittumi paasissutissanik allannissamik qinnuigineqaruit.

Suliniaqatigiiffimmut ilinnut attaveqartumut ilumut attuumassuteqarnersutit tamatigut misissortaruk. Qularuit, attaveqarneq kipitiguk imaluunniit nalunaarut peeruk. Taarsiullugu suliniaqatigiiffik taassuma pisortatigoortumik attaveqarfii aqqutigalugit toqqaannartumik attaveqarfigiuk.

Kinaassutsinnut tunngasut paasissutissat allanut annguppata, pinerluttut illiusaarlutik iliuuseqarsinnaapput.

Tamanna ima kinguneqarsinnaavoq, pinerluttut assersuutigalugu:

  • illit atinnik nioqqutissanik pisillutik,
  • illit atinnik taarsigassarsillutik, imaluunniit
  • illit atinnik abonnementinik pilersitsillutik.

  • Aningaaserivimmi kontot e-mailitillu nakkutigikkit, pisiniarnernik imaluunniit iliuutsinik pasinartunik takussutissaqarnersut misissorlugit.
  • Kinaassutsimut uppernarsaatip assilinera allanut anngussimappat, uppernarsaat taanna oqartussaasumut tunniussisimasumut tammarsimasutut nalunaarutigiuk, nutaamillu pissarsillutit.
  • Inuit attaveqaqatigiittarfiini imminut tunngasunik paasissutissanik sapinngisamik ikinnerpaanik saqqummiussisassaatit.

  • Politiinut nalunaarutiguk.
  • Aningaaserivigisat attaveqarfigiuk, pisariaqarpallu suliffeqarfiit allat eqqugaasimasinnaasut attaveqarfigikkit.
  • Piaartumik digisila.gl imaluunniit pisariaqarpat sikkerdigital.dk's cyberhotline aqqutigalugit siunnersuutinik ilitsersuutinillu pissarsiorit, taakkunanilu kinaassutsimik tillinneq pillugu paasissutissanik pissarsisinnaavutit, ajoqusiisoqareersimappallu qanoq iliortariaqarnerit pillugu ikiorneqarsinnaallutit. Tassani aamma suliaq politiinut nalunaarutigineqartariaqarnersoq, qarasaasiatigullu attaveqarnermi qanoq isumannaannerusumik pissusilersorsinnaanerlutit pillugit siunnersuutinik nassaarisinnaavutit.

Inuk alla pillugu paasissutissanik kukkunikkut tigusaqarsimaguit qanoq iliortariaqarpit?

Inuit allat pillugit inuttut paasissutissanik kukkunikkut tigusaqarsimaguit, inuttut paasissutissanik isumannaallisaanikkut unioqqutitsisoqarsimasinnaavoq.

Paasissutissanik tigusaqarfigisavit suliffeqarfiup imaluunniit oqartussaasup isumannaallisaanikkut unioqqutitsisoqarsimasinnaaneranik ilisimasaqarnersoq qularigukku, Paasissutissanik Nakkutilliisoqarfiup inassutigaa suliffeqarfik imaluunniit oqartussaasoq tamanna pillugu ilisimatissagit.

Inuttut paasissutissat pineqartut ilinnut tunnganngimmata, paasissutissanik taakkuninnga suliarinninneq pillugu Paasissutissanik Nakkutilliisoqarfimmut naammagittaalliuuteqarsinnaanngilatit. Paasissutissanik illersuinermut malittarisassat naapertorlugit taamaallaat illit nammineq inuttut paasissutissaatinnik suliarinninneq pillugu naammagittaalliuuteqarsinnaavutit.