Isumannaallisaanikkut unioqqutitsisoqarneranut atatillugu pisussaaffiit (unioqqutitsisoqarsimaneranik nalunaarutiginnittussaatitaaneq apeqqutaatinnagu)

Oqartussaasut imaluunniit suliffeqarfiit il.il. isumannaallisaanikkut unioqqutitsisoqarneranit eqqugaagunik, pissutsit arlallit tamatigut eqqumaffigisariaqarpaat – unioqqutitsisoqarsimaneranik Paasissutissanik Nakkutilliisoqarfimmut nalunaarutiginnittussaatitaanngikkaluarunilluunniit.

Paasissutissanik Nakkutilliisoqarfiup isumaa malillugu paasissutissanik suliarinninnermi ileqqorissaarnissamut tunngavik malikkaanni, pissusissamisoorpoq paasissutissanik suliarinninnermut akisussaasup inuttut paasissutissanik isumannaallisaanikkut unioqqutitsinerit tamaasa, unioqqutitsinermut atatillugu pissutsit piviusut, kingunerisai aamma unioqqutitsinerup iluarsineqarnissaanut iliuuserineqarsimasut ilanngullugit, uppernarsaasersortassagai.

Tamatumunnga pissutaavoq inuttut paasissutissanik isumannaallisaanikkut unioqqutitsinerit pillugit takussutissiaq uppernarsaatinik tunngavissaqarluartoq, taamaalillunilu aamma ulorianarsinnaasut, iliuusissat il.il. pillugit naliliinerit uppernarsaatinik tunngavissaqarluartut, paasissutissanik suliarinninnermut akisussaasup suliffeqarfiup iluani paasissutissanik illersuinermik suliaqarnermi immikkut eqqumaffigisariaqartut, ajornartorsiutaasinnaasut, ulorianarsinnaasut il.il. suussusersisinnaanissaannut pitsaasumik tunngavissiisarmata.

Inuit ataasiakkaat eqqugaasimasut ilisimatinneqarnerat

Inuttut paasissutissanik isumannaallisaanikkut unioqqutitsinerup inuit ataasiakkaat pisinnaatitaaffiinut kiffaanngissuseqarnissamullu pisinnaatitaaffiinut annertuumik ulorianartorsiortitsisinnaanera ilimanaateqarpat, paasissutissanik suliarinninnermut akisussaasup inuit eqqugaasimasut unioqqutitsineq pillugu ilisimatissavai. Tamanna atuuppoq, isumannaallisaanikkut unioqqutitsisoqarsimaneranik Paasissutissanik Nakkutilliisoqarfimmut nalunaarutiginnittussaatitaaneq apeqqutaatinnagu.

Inuit eqqugaasimasut ilisimatinneqarnissaat aatsaat pisussaaffiuvoq, isumannaallisaanikkut unioqqutitsinerup taakkua pisinnaatitaaffiinut kiffaanngissuseqarnissamullu pisinnaatitaaffiinut annertuumik ulorianartorsiortitsisinnaanera ilimanaateqarpat. Tamanna isumannaallisaanikkut unioqqutitsisoqarsimaneranik Paasissutissanik Nakkutilliisoqarfimmut nalunaarutiginnittussaatitaanermit allaaneruvoq, unioqqutitsinerup ulorianartorsiortitsisinnaanera ilimanaateqanngippat aatsaat nalunaarutiginninnissaq pisariaqanngimmat.

Inuit ataasiakkaat eqqugaasimasut ilisimatinneqarneranni inuttut paasissutissanik isumannaallisaanikkut unioqqutitsinerup qanoq ittuunera oqaatsit erseqqissut paasiuminartullu atorlugit nassuiarneqassaaq, paasissutissallu makku minnerpaamik ilanngunneqassallutik:

  • paasissutissanik illersuineq pillugu siunnersortip imaluunniit paasissutissanik annertunerusunik pissarsiniarluni saaffigineqarsinnaasup allap aqqa attaveqarfissaalu
  • inuttut paasissutissanik isumannaallisaanikkut unioqqutitsinerup kingunerisassaatut ilimanaateqartut nassuiarneqarnerat
  • paasissutissanik suliarinninnermut akisussaasup inuttut paasissutissanik isumannaallisaanikkut unioqqutitsinerup iliuuseqarfiginissaanut iliuuserisimasai imaluunniit iliuuseriniarlugit siunnersuutigisai pillugit nassuiaat, matumani attuumassuteqarpat unioqqutitsinerup ajoqusiisinnaanerata killilersimaarneqarnissaanut iliuusissat ilanngullugit.

Paasissutissanik suliarinninnermut akisussaasup inuit nalunaarsorneqarsimasut ilisimatinngippagit, Paasissutissanik Nakkutilliisoqarfik pissutsit apeqqutaatillugit paasissutissanik suliarinninnermut akisussaasumut inuit pineqartut eqqortumik ilisimatinneqarnissaannik peqqussuteqarsinnaavoq.

Ilisimatitsinerup ilaatigut siunertaraa inuit eqqugaasimasut inuttut paasissutissaatigisaasa isumannaatsuunerisa innarlerneqarsimanerata kingunerisinnaasai killilersimaarniarlugit pisariaqartunik iliuuseqarsinnaanissaannut periarfissinneqarnissaat.

Inuttut paasissutissanik isumannaallisaanikkut unioqqutitsisoqarsimanera paasineqareerpat, paasissutissanik suliarinninnermut akisussaasup inuit eqqugaasimasut pisariaqanngitsumik kinguarsaanani ilisimatissavai.