Paasitinneqarsinnaatitaaneq
Paasissutissanik ilinnut tunngasunik, oqartussaqarfiup imaluunniit suliffeqarfiup atugaani qarasaasiatigut systeminiittunik imaluunniit nalunaarsuiffinniittunik, takunnikkumallutit qinnuiginnissinnaavutit. Aamma takussutissiamik imaluunniit assilineranik
piumasaqarsinnaavutit.
Paasissutissat ilinnut tunngasut kisiisa takunissaannut inunnut paasissutissanik suliarinnittarneq pillugu inatsit naapertorlugu pisinnaatitaavutit.
Oqartussaqarfik imaluunniit suliffeqarfik attaveqarfigiuk
Paasitinneqarusukkuit oqartussaqarfik imaluunniit suliffeqarfik illit pillutit paasissutissanik pigisalik attaveqarfigissavat.
Assersuutigalugu sianerlutit, allakkatigut imaluunniit e-maili aqqutigalugu paasitinneqarnissannik kissaateqarsinnaavutit.
Piffissaliineq
Paasitinneqarnissannik kissaateqaruit oqartussaqarfik imaluunniit suliffeqarfik akissuteqassaaq.
Periarfissaq siulleq atorlugu akineqassaatit, kisianni akinissamut aalajangersimasumik piffissaliisoqanngilaq. Sapaatit akunneri sisamat sinnerlugit sivisussuseqarpat qaqugu akineqarnissat pillugu nassuiaanneqarlutillu nalunaarfigineqassaatit.
Suut paasisaqarfigissavigit?
Oqartussaqarfiup imaluunniit suliffeqarfiup illit pillutit paasissutissat pigisami imarisai tunniutissavai. Illit pillutit paasissutissaqanngippat tamanna pillugu aamma ilisimatinneqarnissannut pisinnaatitaaffeqarputit.
Paasissutissanik paasitinneqarsinnaatitaaffinnut ilaapput illit pillutit paasissutissat, paasitinneqarnissamik kissaateqarnerpit nalaani nalunaarsorneqarsimasut, aamma paasissutissat akissuteqarfigineqarnissavit tungaanut ilanngunneqartut.
Paasitinneqarnissannik kissaateqareeruit suli paasitinneqartinnak paasissutissat ilinnut tunngasut peerneqassanngillat.
Allakkatigut akissuteqarfigineqarnissannik kissaateqarsimaguit paasissutissat takussutissianngorlugit pissarsiarinissaannut tunngaviusumik pisinnaatitaaffeqarputit
Paasitinneqarnissat ilaatiguinnaq pisinnaatitaaffigivat
Pisuni immikkut ittuni paasitinneqarsinnaatitaanngilatit. Taakku assersuutigalugu tassaasinnaapput niuernikkut isertuussat, isumaqatigiissutinut tunngasut assigisaasaluunnit paasitinneqarnermi ersersinneqartussanngortussat.
Allanik pissuteqartumik paasitinneqarnissannut aamma naaggaarneqarsinnaavutit – assersuutigalugu naalagaaffiup isumannaatsuutinneqarnissaata, politiit pinerluttoqarsimaneranik paasiniaanerat assingusullu eqqarsaatigineqarnissaat.
Aamma illit pillutit paasissutissanik, kisitsitigut nalunaarsuinissamut aamma ilisimatusarnermut taamaallaat atorneqartussanik, paasitinneqarsinnaatitaanngilatit.
Inunnik paasissutissanik suliarinnittarneq pillugu inatsit naapertorlugu aamma suut allat pisinnaatitaaffigivigit?
- Oqartussaqarfinnit aamma suliffeqarfinnit ilisimatinneqarnissaq, illit pillutit paasissutissanik elektroniskimik katersuillutillu toqqortaateqarpata.
- Illit pillutit paasissutissat atorneqarnerannut akerliuneq – akerliunerit pissutissaqarpat paasissutissat nalinginnaasumik peerneqassapput.
- Illit pillutit paasissutissat, aamma pisisartuuninnut tunngasut pilerisaarineq siunertaralugu allanut tunniunneqarnissaannut akerliliinissaq.
- Paasissutissat eqqunngitsut iluarsineqarnissaannik, peerneqarnissaannik imaluunniit naqqinneqarnisssaannik kissaateqarneq, aamma allat paasissutissanik tigusaqarsimasut susoqarsimaneranik nalunaarfigineqassasut.
- Illit pillutit paasissutissanik suliarinninnissamik akuersininnik utertitsineq.
- Datatilsynimut maalaaruteqarnissaq – kisianni oqartussaqarfik imaluunniit suliffeqarfik naammagittaalliutigisat naammagittaalliutivit akineqarnissaat pillugu saaffigeqqaaruk.