Kikkut isumannaallisaanikkut unioqqutitsisoqarsimaneranik Paasissutissanik Nakkutilliisoqarfimmut nalunaarutiginnittussaatitaappat?
Inatsisinik atuutsitsinermik oqartussaasut isumannaallisaanikkut unioqqutitsisoqarsimanera Paasissutissanik Nakkutilliisoqarfimmut nalunaarutigissavaat, unioqqutitsineq inuttut paasissutissanik suliarinninnermut atatillugu pisimappat, ilaatigut pinerluttulerinermi akisussaatitsisoqarsinnaaneranik kinguneqarsinnaasunik iliuutsinik pinaveersaartitsinissaq, misissuineq, paasinninneq imaluunniit eqqartuussivitsigut malersuinissaq, imaluunniit pinerluttulerinermi pineqaatissiissutinik naammassinninnissaq siunertaralugu.
Inatsisinik atuutsitsinermik oqartussaasut, malittarisassanit pineqartut, tassaapput politiit, unnerluussisussaatitaasut, taakkununnga ilanngullugit sakkutuut unnerluussisussaatitaat aamma eqqartuussisarnermi pisortat, Kalaallit Nunaanni Pinerluuteqarsimasunut Isumaginnittoqarfik, Politiit pillugit Maalaarutinik Oqartussaqarfik Attuumassuteqanngitsoq aamma eqqartuussiviit.
Isumannaallisaanikkut unioqqutitsisoqarsimanera pisariaqanngitsumik kinguarsaanani, ajornanngippallu paasissutissanik suliarinninnermut akisussaasup unioqqutitsisoqarsimanera paasineranit kingusinnerpaamik nalunaaquttap akunnerisa 72-it iluanni nalunaarutigineqassaaq.
Paasissutissanik suliarinninnermut akisussaasup (oqartussaasup) sulisoq ataaseq imaluunniit sulisut arlallit, paasissutissanik suliarinninnermut akisussaasoq sinnerlugu inuttut paasissutissanik isumannaallisaanikkut unioqqutitsisoqarsimaneranik Paasissutissanik Nakkutilliisoqarfimmut nalunaarutiginninnissamut piginnaatinneqartut, suliffeqarfimmi toqqartariaqarpai. Sulisoq sulinerminut atatillugu inuttut paasissutissanik isumannaallisaanikkut unioqqutitsisoqarsimatillugu iliuusissanik isumaginnittareersoq toqqarneqarpat, tamanna iluaqutaasinnaavoq.
Paasissutissanik suliarinnittoq aamma paasissutissanik suliarinninnermut akisussaasoq sinnerlugu inuttut paasissutissanik isumannaallisaanikkut unioqqutitsisoqarsimaneranik Paasissutissanik Nakkutilliisoqarfimmut nalunaarutiginnissinnaavoq. Taamaaliorsinnaassagunili paasissutissanik suliarinnittup nalunaarutiginninnissamut piginnaatinneqarsimanissaa pisariaqarpoq. Allat – assersuutigalugu eqqartuussissuserisut imaluunniit siunnersortit – paasissutissanik suliarinninnermut akisussaasumit piginnaatinneqarsimappata, taassuma sinnerlugu unioqqutitsisoqarsimanera nalunaarutigisinnaavaat.
Inuttut paasissutissanik isumannaallisaanikkut unioqqutitsisoqarsimaneranik nalunaarutiginninnissamut inatsisitigut akisussaaffik pingaarneq – nalunaarutiginninnerup piffissaq eqqorlugu pinissaa ilanngullugu – oqartussaasumi paasissutissanik suliarinninnermut akisussaasumiiginnassaaq, allat taassuma sinnerlugu unioqqutitsisoqarsimaneranik nalunaarutiginninnissamut piginnaatinneqarsimanerat apeqqutaatinnagu.
Unioqqutitsinerit suut nalunaarutigineqartussaappat?
Inuttut paasissutissanik isumannaallisaanikkut unioqqutitsisoqarsimanera Paasissutissanik Nakkutilliisoqarfimmut nalunaarutigineqassaaq, unioqqutitsinerli inuit ataasiakkaat pisinnaatitaaffiinut imaluunniit kiffaanngissuseqarnissamut pisinnaatitaaffiinut ajoqusiisinnaanera ilimanaateqanngitsutut nalilerneqarpat nalunaarutigineqarnissaa pisariaqanngilaq.
Inuit ataasiakkaat pisinnaatitaaffiisa kiffaanngissuseqarnissamullu pisinnaatitaaffiisa ulorianartorsiortinneqarnerat isumaqarpoq, isumannaallisaanikkut unioqqutitsinerup inunnut ataasiakkaanut kingunerlutsitsisinnaanera. Assersuutigalugu assigiinngisitsineq, kinaassutsimik tillinneq imaluunniit kinaassuseq atornerlullugu peqquserlunneq, aningaasatigut annaasaqarneq, tusaamaneqarnerup ajoquserneqarnera, paasissutissat nipangiussisussaatitaanermut ilaatinneqartut isertuussaanerisa annaaneqarnera imaluunniit inummut paasissutissanik nalunaarsorneqarsimasumut aningaasatigut imaluunniit inuiaqatigiinni atugarisatigut annertuumik ajoqusiinerit allat pineqarsinnaapput.
Inuttut paasissutissanik isumannaallisaanikkut unioqqutitsinerup inunnut eqqugaasunut kinguneqassanngitsutut nalilerneqarnera assersuutigalugu paasissutissanik suliarinninnermut akisussaasup isumannaallisaanissamut iliuuserisimasaanik tunngaveqarsinnaavoq. Tamanna aamma paasissutissanik suliarinninnermut akisussaasup piaartumik iliuuseqarsimaneranik imaluunniit inuttut paasissutissat susassaqanngitsunit ilisimaneqalersimanersut paasiniarsinnaaneranik tunngaveqarsinnaavoq.
Paasissutissanik suliarinninnermut akisussaasup uppernarsartussaavaa pissutsit suut tunngavigalugit inuttut paasissutissanik isumannaallisaanikkut unioqqutitsinerup inunnut eqqugaasunut kinguneqarsimanissaa imaluunniit kinguneqarsinnaanissaa ilimanaateqanngitsutut nalilerneqarnersoq. Tassa imaappoq, naliliinermi unioqqutitsinerup inuit paasissutissaatinik nalunaarsorneqarsimasut qanoq kingunerlutsitsiffigisinnaanerlugit imaluunniit kingunerlutsitsiffigereersimasinnaanerlugit periarfissat suulluunniit misissorneqarsimassapput.
Isumannaallisaanikkut unioqqutitsisoqarsimanera qanoq nalunaarutigineqassava?
Suliffeqarfiit oqartussaasullu isumannaallisaanermut tunngasunik pisoqarsimaneranik – inuttut paasissutissanik isumannaallisaanikkut unioqqutitsinerit ilanngullugit – nittartakkakkut virk.dk nalunaarutiginnissinnaanissaannut ataatsimoorussamik nalunaarutiginnittarfimmik pilersitsisoqarsimavoq. Unioqqutitsisoqarsimanera aamma allatigut nalunaarutigisinnaavat, assersuutigalugu Paasissutissanik Nakkutilliisoqarfimmut e-mailimik nassitsinikkut.
Nittartakkami virk.dk immersugassami elektroniskiusumi Paasissutissanik Nakkutilliisoqarfimmut nalunaarutiginninnermi immersugassat attuumassuteqartut nalunaaqutsersorneqarsimapput. Taamaattumik nalunaarutiginninninni apeqqutit suut akissuteqarfigissanerlugit siumoortumik takusinnaavat.
Makku nassuiarnissaat nalunaarutiginissaallu qinnuigineqassaatit:
- inuttut paasissutissanik isumannaallisaanikkut unioqqutitsinerup qanoq ittuuneranik nassuiaaneq
- paasissutissanik illersuineq pillugu siunnersortip imaluunniit paasissutissanik amerlanerusunik pissarsiniarluni saaffigineqarsinnaasup allap aqqa attaveqarfissaalu nalunaarutiginissaat
- inuttut paasissutissanik isumannaallisaanikkut unioqqutitsinerup kingunerisinnaasaasa nassuiarnissaat
- inuttut paasissutissanik isumannaallisaanikkut unioqqutitsinerup iliuuseqarfiginissaanut iliuuserisimasavit imaluunniit iliuuseriniakkatut siunnersuutigisavit nassuiarnissaat, matumani – attuumassuteqarpat – unioqqutitsinerup ajoqusiisinnaanerata killilersimaarneqarnissaanut iliuusissat ilanngullugit.
Immersugassamik immersuininni apeqqutit ilaannut nassuiaatit naatsut iluaqutigisinnaasatit nassaarisinnaavatit.
Nalunaarummi paasissutissat minnerpaamik ilanngunneqartussat Paasissutissanik Nakkutilliisoqarfiup inuttut paasissutissanik isumannaallisaanikkut unioqqutitsinerup nalunaarutigineqartup naleqquttumik iliuuseqarfigineqarneranik malinnaasinnaaneranut naliliisinnaaneranullu iluaqutaassapput. Paasissutissanik Nakkutilliisoqarfik aamma paasissutissat tunngavigalugit inuit eqqugaasimasut ilisimatinneqarnissaat pillugu aalajangiinissaq pisariaqarnersoq naliliisinnaavoq (inuit eqqugaasimasut suli ilisimatinneqarsimanngippata). Paasissutissat aamma Paasissutissanik Nakkutilliisoqarfiup suliaq sukumiinerusumik misissorneqartariaqarnersoq naliliineranut tunngaviusinnaapput.
Nalunaarut unioqqutitsinermut tunngatillugu paasissutissanik attuumassuteqartunik tamanik ilaneqarpat, tamanna Paasissutissanik Nakkutilliisoqarfimmut iluaqutaasinnaavoq. Paasissutissanik Nakkutilliisoqarfik nalunaarummik naliliinermini pisariaqartutut isigiguniuk, kingusinnerusukkut paasissutissanik ilassutaasunik aamma noqqaassuteqarsinnaavoq.
Malugiuk: Immersugassami inuit eqqugaasimasut pillugit inuttut paasissutissanik ilanngussissanngilatit – taamaallaalli inuit pillugit paasissutissat immersugassami erseqqissumik apeqqutigineqartut, soorlu nalunaarutiginnittup aqqa attaveqarfissaalu, ilanngunneqarsinnaapput.
EQQAAMAJUK immersugassaq nassiutereerukku assilinera qarasaasiannut aassagit. Nalunaarutit tamarmik Erhvervsstyrelsip qarasaasiatigut aaqqissuussaani ullut 30-t qaangiunneranni peerneqartarput. Taamaattumik immersugassap assilinera qarasaasiannut aasat nalunaarutip nassiunneqarsimaneranut uppernarsaatitut pigissavat.
Inuttut paasissutissanik isumannaallisaanikkut unioqqutitsisoqarsimaneranik nalunaarutit Paasissutissanik Nakkutilliisoqarfimmit qanoq suliarineqartarpat
Paasissutissanik Nakkutilliisoqarfiup inuttut paasissutissanik isumannaallisaanikkut unioqqutitsinerit nalunaarutigineqartut tamaasa aallaqqaammut misissortarpai, nalunaarut tunngavigalugu annertunerusumik iliuuseqarnissamut tunngavissaqarnersoq nalilerniarlugu. Paasissutissanik Nakkutilliisoqarfiup assersuutigalugu pisimasup qanoq ittuunera annertussusialu, inuttut paasissutissat pineqartut suussusii, paasissutissanik suliarinninnermut akisussaasup (aamma paasissutissanik suliarinnittup, taanna pineqarsimappat) pisimasoq sioqqullugu pisimasullu kingorna iliuuserisimasai, aamma inuit eqqugaasimasut ilisimatinneqarsimanersut imaluunniit ilisimatinneqartariaqarnersut nalilersortarpai.
Pingaaruteqarpoq erseqqissaatigissallugu Paasissutissanik Nakkutilliisoqarfiup isumannaallisaanikkut unioqqutitsisoqarsimanera iluarsisinnaanngimmagu.
Paasissutissanik Nakkutilliisoqarfiup suliassaraa paasissutissanik suliarinninnermut akisussaasup (aamma taassuma paasissutissanik suliarinnittup, taanna pineqarsimappat) paasissutissanik illersuinermut malittarisassat isumannaallisaanikkut unioqqutitsineq sioqqullugu aamma unioqqutitsinerup kingorna taassuma iliuuseqarfigineqarnerani malissimaneraat misissussallugu.
Amerlasuutigut isumannaallisaanikkut unioqqutitsisoqarsimaneranik nalunaarut tunngavigalugu Paasissutissanik Nakkutilliisoqarfiup annertunerusumik iliuuseqarnissaa pisariaqarneq ajorpoq. Taamaattumik nalunaarutip suliarineqarnera oqarasuaatikkut imaluunniit pisortatigoortumik aalajangiinerunngitsumik inaarutaasumik allakkamik nassiussinikkut naammassineqartarpoq. Allakkani inaarutaasuni taakkunani Paasissutissanik Nakkutilliisoqarfik paasissutissanik illersuinermut malittarisassanik unioqqutitsisoqarsimanersoq pillugu isummerneq ajorpoq. Allakkami ilaatigut inassuteqaatit isumannaallisaanikkut unioqqutitsinermut nalunaarutigineqartumut attuumassuteqartutut nalilerneqartut ilanngunneqarsinnaapput.
Paasissutissanik Nakkutilliisoqarfiup paasissutissanik illersuinermut malittarisassanik unioqqutitsisoqarsimasoq nalilerpagu, nakkutilliisoqarfik taamaattoq aamma isornartorsiuinermik imaluunniit sakkortuumik isornartorsiuinermik imalimmik aalajangiinissamik toqqaasinnaavoq.
Paasissutissanik Nakkutilliisoqarfik aamma peqqussuteqarsinnaavoq, paasissutissanik suliarinninnermut akisussaasoq imaluunniit paasissutissanik suliarinnittoq aalajangersimasunik iliuusissanik atuutilersitsissasoq aamma/imaluunniit inuit eqqugaasimasut ilisimatissagai.
Paasissutissanik suliarinnittumi pisimasoq ataaseq pillugu paasissutissanik suliarinninnermut akisussaasut amerlasuut isumannaallisaanikkut unioqqutitsisoqarsimaneranik nalunaarutiginnissimappata, Paasissutissanik Nakkutilliisoqarfik nammineq suliniuteqarluni paasissutissanik suliarinnittoq pillugu suliamik aallartitsinissamik aalajangiisinnaavoq. Paasissutissanik suliarinninnermut akisussaasoq ataaseq piffissami sivisuumi isumannaallisaanikkut unioqqutitsinerit assingusut amerlasuut pillugit nalunaarutiginnittarsimappat, Paasissutissanik Nakkutilliisoqarfik aamma nammineq suliniuteqarluni suliamik aallartitsisinnaavoq.