Nittartakkatigut inuit attaveqaqatigiittarfii aamma internetti

Inunnik paasissutissanik suliarinnittarneq pillugu inatsit

Inunnik paasissutissanik suliarinnittarneq pillugu inatsit ilaatigut inuit allat pillugit paasissutissanik illit tamanut saqqummiussininnut atuuppoq. Assersuutigalugu internettimi ilanngussamik allakkuit. Inatsit aammattaaq atuuppoq inuit allat assinginik, imaluunniit nipinik immiussanik tamanut saqqummiussiguit.

Inuit ilisarineqarsinnaagaangata

Inuit pillugit paasissutissat tassaapput kina pineqarnersoq arlaannaataluunniit paasisinnaappagu. Tassa inuit pillugit paasissutissaasinnaapput, inuup atia allanngikkaluarukkuluunniit.

Taamaaliornissannut akuerineqarpit?

Inummit pineqartumit akuerineqaruit nalinginnaasumik taanna pillugu paasissutissat tamanut saqqummiussinnaavatit. Meeraq mikisoq pineqarpat taassuma angajoqqaavi akuersisuussapput. 

Akuerineqarsimanngikkuit inuk alla pillugu paasissutissat ajoqutaasussaanngitsut kisiisa tamanut saqqummiussinnaavatit. Tassa ima soqutaanngitsigissapput nalinginnaasumik ajuallaatigineqarsinnaasussaassanatik.

Aamma akornutaasussaaneq ajorpoq paasissutissanik inummut tunngasunik, nammineq imminut pilluni paasissutissanik tamanut saqqummiutereersimasaanik, tamanut saqqummiussiguit.

Assit

Inuup allap assinganik tamanut saqqummiussisinnaanngilatit, inummit pineqartumit akuerineqaqqaarsimanngikkuit. Tamanna aamma atuuppoq inuit marluullutik assinginut tunngatillugu. Imaluunniit assersuutigalugu klassemi ataatsimi atuaqatigiit tamarmik, assilisinnissaminnut ataatsimoortinneqarsimasut, assinginut tunngatillugu.

Assit allat, ajuallannartuunngippata, akuersititseqqaarnak nalinginnaasumik tamanut saqqummiussinnaavatit. Kisianni assinik saqqummiusseqqusaanngilatit nalunngikkukku inuit assimiittut tamanna kissaatiginngikkaat.

Assimik saqqummiussereernerpit kingorna akerliliisoqarpat taakku aamma tusaaniartariaqarpatit, assilu internettimiit peerlugu.

Inummik allamik iluaalliortitsippata

Saqqummiussisimaguit isumaqarlutit ajunngitsoq, paasinarsippallu taassuma nuannarinngikkaa, taanna naalassavat. Paasissutissat internettimit piissavatit, taamaaliorsinnaatitaallutit qularnarunnaarsissinnaanngikkukku. 

Assersuutigalugu imaassinnaavoq isummat oqaatigisimagit, tamannalu killiligaanani oqaaseqarsinnaatitaanermut tunngatillugu ajunngitsoq. Killiligaananili oqaaseqarsinnaatitaanerup allat pillugit paasissutissanik killeqanngitsumik tamanut saqqummiussisinnaanissanik pisinnaatitaaffilinngilaatit.

Taamaattumik eqqarsarluaqqaartarit. Aamma eqqaamajuk allatatit, imaluunniit tamanut saqqummiussatit aqqutigalugit inuit allat ajuallatsissinnaagakkit. Eqqarsaatigiuk illit nammineq killissat sumut killeqarnersoq.

Paasissutissat inunnut ataasiakkaanut tunngasut

Paasissutissat inunnut ataasiakkaanut allanut tunngalluinnartut aamma mianerisariaqartut tamanut saqqummiutissanngilluinnarpatit. Taakku tassaasinnaapput inuup napparsimanera imaluunniit akiitsoqarnera pillugu paasissutissat. Aamma tassaasinnaapput inuup akiligassinneqarsimanera, imaluunniit tillinniarsimasutut pasisaanera pillugu paasissutissat. 

Paasissutissanik inunnut ataasiakkaanut tunngasunik tamanut saqqummiussiguit, inunnik paasissutissanik suliarinnittarneq pillugu inatsimmik unioqqutitsisinnaavutit.

Paasissutissanik tamanut saqqummiussinikkut inuit allat sakkortuumik kanngunarsarukkit aamma tamanna pinerluttulerinermi inatsimmik unioqqutitsinerusinnaavoq. Tamanna aamma atuuppoq inuup allap atisaqarani assinginik tamanut saqqummiussiguit.

Paasissutissat illit nammineq tamanut saqqummiussatit

Illit assinnik, imaluunniit illit pillutit paasissutissanik tamanut saqqummiussiguit allat paasissutissanik atuinissaannik aamma periarfississavatit.

Allat paasissutissanik imaluunniit assinik, illit nammineq tamanut saqqummiussimasannik, peersitinnissaannut Datatilsyni amerlasuutigut ikiuussinnaaneq ajorpoq.

Tamaattumik paasissutissanik internettikkut saqqummiussitinnak eqqarsarluaqqissaaqqaartassaatit. Peqqissimiguit paasissutissat piivinnissaat amerlasuutigut ajornarluinnartarpoq.

Akisussaasumut tamatigut saaffiginneqqaartarit

Inuup allap illit assinnik, imaluunniit illit pillutit paasissutissanik internettikkut tamanut saqqummiussinera iluarinngikkukku taava aallaqqaammut inuk taanna attaveqarfigeqqaaruk.

Inuk taanna taakkununnga akisussaasuuvoq, aammalu akerliunerit isummerfigissallugu.

Quppernerit salloqittaatit

Immaqa naammattoorumaarpat inuk alla, nittartakkatigut inuit attaveqaqatigiittarfiisigut, illiusuusaarluni quppernermik pilersitsisimasoq.

Pisumi taama ittumi nittartakkatigut inuit attaveqaqatigiittarfiat saaffigisariaqarpat

Datatilsyni

Paasissutissat peerneqarnissaannik qinnuiginninerit naapertorlugu akisussaasoq peersinngippat immaqa Datatilsynip ikiorsinnaassavaatit.

Kisianni tamanut saqqummiussineq ajunngippat – assersuutigalugu killiligaanani oqaaseqarsinnaatitaanermut ilaatinneqarpat – taava paasissutissat peerneqarnissaannik Datatilsyni peqqusisinnaanngilaq.

Pinerluttulerinermi inatsimmik unioqqutitsineq Datatilsynimit isummerfigineqarsinnaanngilaq. Tamatumani politiinut saaffiginnittoqassaaq.