Inuttut paasissutissanik isumannaallisaanikkut unioqqutitsineq tassaavoq pisimasoq sunaluunniit, inuttut paasissutissat nassiunneqarsimasut, toqqortarineqarsimasut imaluunniit allatigut suliarineqarsimasut nalaatsornikkut imaluunniit inatsisinik unioqqutitsilluni suujunnaarsinneqarnerannik, annaaneqarnerannik imaluunniit allanngortinneqarnerannik, imaluunniit akuersissuteqarani allanut ingerlateqqinneqarnerannik imaluunniit paasissutissanut taakkununnga isersinnaalersimanermik kinguneqartoq.
Tassa imaappoq, pisimasoq inuttut paasissutissanik isumannaallisaanikkut unioqqutitsinertut isigineqarsinnaassappat, piumasaqaatit marluk naammassineqarsimassapput:
Siullermik isumannaallisaanikkut unioqqutitsisoqarsimassaaq, tassa imaappoq, paasissutissanik suliarinninnermut akisussaasup isumannaallisaanermut iliuusissatut aalajangersarsimasai unioqqutinneqarsimassapput imaluunniit taakkua malinneqarsimassanngillat. Assersuutigalugu qarasaasiatigut saassussinermi ajoqusiiniartup firewallimik imaluunniit assingusunik isumannaallisaanermut illersuutinik qaangiilluni qarasaasiatigut attaveqarfimmut isersinnaalersimanera pineqarsinnaavoq. Sulisup suliffeqarfiup imaluunniit oqartussaasup malittarisassai suleriaasiilu unioqqutillugit iliuuseqarnera aamma pineqarsinnaavoq.
Aappaattut pisimasoq inuttut paasissutissanut tunngatillugu makkuninnga ataatsimik arlalinnilluunniit kinguneqarsimassaaq:
- Suujunnaarsitsineq: Assersuutigalugu inuttut paasissutissat peerneqarpata imaluunniit allatigut suujunnaarsinneqarpata, taamaalillutik paasissutissat piujunnaarlutik imaluunniit paasissutissanik suliarinninnermut akisussaasup suliarisinnaasaanik iluseqarunnaarlutik.
- Annaasaqarneq: Paasissutissanik suliarinninnermut akisussaasup paasissutissat siornatigut nakkutigisinnaasani imaluunniit iserfigisinnaasani nakkutigisinnaajunnaarpagit imaluunniit iserfigisinnaajunnaarpagit. Annaasaqarneq aamma utaqqiisaagallartumik pisinnaavoq, assersuutigalugu qarasaasiatigut aaqqissuussinermut inuttut paasissutissanik imalimmut isersinnaaneq annaaneqarpat, kingusinnerusukkulli isersinnaaneq pilerseqqinneqarpat. Aamma pappiaqqatigut allagaatit, assersuutigalugu allakkat, tammarsimasut pineqarsinnaapput.
- Allanngortitsineq: Inuttut paasissutissat allanngortinneqarpata imaluunniit ajoquserneqarpata, taamaalillutik assersuutigalugu eqqortuunaarlutik imaluunniit amigaateqalerlutik. Tamanna ilaatigut allagaatinik journalimut kukkusumik nalunaarsuinermut atatillugu pisinnaavoq.
- Akuersissuteqarani allanut ingerlatitseqqiineq paasissutissanullu isersinnaaneq: Inuttut paasissutissat inunnut taakkuninnga tigusaqarnissamut imaluunniit iserfiginninnissamut akuersissummik peqanngitsunut ingerlateqqinneqarpata imaluunniit pissarsiarineqarsinnaalersinneqarpata.
- Inuttut paasissutissanut inatsisinik unioqqutitsilluni iserneq: Inuttut paasissutissat akuerisaanngitsumik iserfigineqarpata, assersuutigalugu qarasaasiatigut iserniartartup inuttut paasissutissanut isersinnaalersimaneratigut, imaluunniit sulisup inatsisinik imaluunniit suliffeqarfiup iluani malittarisassanik unioqqutitsilluni inuttut paasissutissat iserfigeqqusaanngisani iserfigippagit, paasissutissanut taakkununnga isersinnaanissamut akuersissummik peqarnera peqannginneraluunniit apeqqutaatinnagu.
Paasissutissanik illersuinermut inatsisit malillugit inuttut paasissutissanik isumannaallisaanikkut unioqqutitsisoqarsimasutut aatsaat isigineqarsinnaavoq, unioqqutitsinermi inuttut paasissutissat pineqarsimappata. Taamaattumik paasissutissanik isumannaallisaanermut tunngatillugu pisimasoq inuttut paasissutissanik isumannaallisaanikkut unioqqutitsinertut tamatigut isigineqarsinnaanngilaq.
